இந்த லொக் டௌன் காலத்தில் வெப் சீரிஸ் அல்லது திரைப்படங்கள் பார்த்து போரடித்து ஏதாவது குறும்படம் பார்ப்போம் என்றால், ஏன்தான் பார்த்தோம் என்று ஆகிவிடுகிறது. உப்புச்சப்பில்லாத கதைகள், நடிக்கத்தெரியத நடிகர்கள், தேவையில்லாத பாடல்கள் என்று ஒரே இம்சைதான். இதில் Award winning Tamil short film என்று வேறு போட்டிருப்பார்கள். முக்கால்வாசி குறும்படங்கள் பார்த்துச் சலித்த காதல் கதைகளாகவே இருக்கும்.
இந்தமாதிரி தொல்லைகள் இல்லாத ஒரு குறும்படத்தை நம்நாட்டுக்காரர் கார்த்திக் சிவா இயக்கியுள்ளார். சற்றே பெரிய குறும்படம். நாற்பத்தைந்து நிமிடங்கள் வரை நீண்ட குறும்படம். பெயரிலேயே எதைப்பற்றிய படம் என தெரிகிறது. பிறந்தது முதல் தகப்பனாலும் திருமணத்தின் பின் கணவனாலும் அடக்குமுறைக்குள்ளாக்கப்பட்டு தனது ஆசைகளையும் கனவுகளையும் தியாகம் செய்யவேண்டிய ஒரு பெண்தான் முதன்மைப் பாத்திரம். ஒருகட்டத்தில் புருசனின் கனவுக்காக எதிர்பாராத ஒன்றைத் தியாகம் செய்யவேண்டி வரும்போது என்ன செய்தாள், தனது கனவை அடைந்தாளா என்பதே மையக்கரு.
குறும்படத்தின் முதல் வெற்றி கதையை சிதைக்காத திரைக்கதையமைப்பு. Non linear காட்சியமைப்பில் திரைக்கதையமைக்கப்பட்டுள்ளது. லக்ஷ்மி கதாபாத்திரத்தின் ஆசைகளும் கனவுகளும் சிறுவயது முதல் கல்யாணமானபின்பு வரை எல்லாமே நிராசையாவது நன்றாக காட்சிப்படுத்தப்பட்டுள்ளது. லக்ஷ்மி கதாபாத்திரத்தில் நடித்த நட்சத்திரா ஒரு தேர்ந்த நடிகை. இதிலும் நன்றாகவே நடித்திருந்தார். ஆச்சரியம் சிறுவயது லக்ஷ்மியாக நடித்த நடிகை. தனது ஏமாற்றங்களை நன்றாகவே பிரதிபலித்தித்திருந்தார். மற்றைய நடிகர்களின் நடிப்பும் நன்றாகவே இருந்தது. நடிக நடிகையர் தேர்வுக்கு ஒரு சபாஸ் இயக்குனருக்கு.
அடுத்ததாக குறிப்பிட்டுச் சொல்லவேண்டியது வசனங்கள். சிறுவயது லக்ஷ்மியும் தோழியும் விவாதிக்கும் காட்சிகளாகட்டும் லக்ஷ்மியின் நேர்காணலில் வரும் வசனங்களாகட்டும் மிகவும் நன்றாக இருந்தது. இல்லையேல் சற்று நீளமான குறும்படம் சலிப்படையவைத்திருக்கும். ஒளிப்பதிவும் நன்றாகவே இருந்தது. படத்தொகுப்பில் முன்பின்னாக காட்சிகளை காட்டவேண்டிய நிலையிலும் நன்றாகவே படத்தொகுப்பு இருந்தது. நீளம் கருதி லக்ஷ்மியின் நேர்காணல் காட்சிகளில் சிலவற்றை வெட்டியிருக்கலாம். ஏனெனில் படத்தில் நேர்காணலின் நோக்கமே லக்ஷ்மியின் கனவுகள் நனவாவதை சொல்வதுதான். இறுதியில் நேர்காணல் செய்பவர் கேட்கும் லக்ஷ்மியின் அமைப்பை தொடர்புகொள்வது பற்றிய விபரங்கள் மற்றும் லக்ஷ்மி நிகழ்ச்சியை வாழ்த்தும் காட்சிகளை வெட்டியிருக்கலாம்.
ஒரு சமூகநல கருத்தையெடுத்து அதை சிறப்பாக இயக்கிய கார்த்திக் சிவாவிற்கும் குழுவினருக்கும் வாழ்த்துக்கள். குறும்பட இணைப்பு கீழே.
No comments:
Post a Comment